Glibenclamide ni umuti ukoreshwa n’abarwayi ba diyabete. Ukaba uzwi cyane ku izina rya Daonil. Ni umuti uboneka ari ibinini biri mu ngero za 1.25mg, 2.5mg na 5mg.
UKO UMUTI UKORESHWA
Mu gutangira hakoreshwa 2.5mg za glibenclamide ku munsi
Uyu muti ni byiza kuwukoresha rimwe ku munsi ku masaha adahinduka. Bikaba byiza kuwufata nyuma y’ifunguro rya mugitondo.
Glibenclamide ikoreshwa mu kuvura iki?
Uyu muti ukoreshwa mu kuvura diyabete yo mu bwoko bwa 2 aho ukora mu gutuma umubiri ukora umusemburo wa insuline, ufite akamaro ko kugabanya isukari mu mubiri w’umurwayi.
Ikindi kandi ni uko uyu muti unafasha umubiri mu gusohora amazi mu mubiri
Ukaba uwuhabwa na muganga nyuma yo gusanga urwaye diyabete.
Ni izihe ngaruka glibenclamide ishobora gutera
Uyu muti ushobora kugutera:
- Kwituma nabi, impatwe cyangwa impiswi.
- Ushobora gutuma kandi wongera ibiro.
- Uyu muti kandi kuwufata bishobora kugutera kumva uhora ushonje, umunabi no kwiheba.
Uru si urutonde rwuzuye rw’ibibazo ushobora kugaragaza, mu gihe utangiye kugaragaza bimwe muri ibi bibazo cg ibindi, ni ngombwa kubibwira muganga mu buryo bwihuse.
Ibyo kwitondera
Uyu muti ntuhabwa abana
Uyu muti ntiwemerewe umugore wonsa
Ni byiza guhita urya ukimara kunywa ibinini
Mu gihe uri kuwunywa ntiwemerewe inzoga
Ni ngombwa kunywa umuti uko muganga yabikubwiye, mu gihe waramuka ugize ikibazo ugomba kubibaza muganga cg farumasiye ukwegereye.
