Namenya nte ko imiti ari imyiganano? 

Muri iyi minsi imvugo ngo ikintu ni feke, ngo iki pirate cyangwa ngo ni igishinwa, abandi bati ni igituburano ntabwo ari imvugo nshyashya ahubwo ni imvugo usanga abantu bose bamaze kumenyera.

No ku miti dukoresha rero birashoboka ko ishobora kwiganwa, wajya uyinywa ntukire kandi wayinyoye neza ndetse n’indwara uri kuvura ariyo miti iyivura.

Muri iyi nkuru rero tugiye kurebera hamwe niba koko bishoboka ko wamenya niba imiti ari imyiganano.

1. Imiti y’imyiganano ni iyihe?

Tuvuga ko umuti ari umwiganano iyo utujuje ibisabwa byose ngo witwe uko. Ibyo ni ingano y’umuti ishobora kuba nke, nyinshi se cyangwa ugasanga nta na muke urimo. Ikindi ni uko akenshi uwo muti uba ufite izina rizwi kuko ntibapirata umuti ngo bawite izina ritabaho.

Kandi nanone iyo bigana, akenshi bigana imiti bazi ko ihenze, noneho bo igiciro bakakigabanya cyangwa se bakakirekera uko gisanzwe.

2. Umuti w’umwiganano urangwa n’iki?

Umuti w’umwiganano ntacyo uba utandukaniyeho n’umuzima iyo ubyitegereje inyuma utabisobanukiwe.

• Gusa iyo ubisobanukiwe ushobora kugira amakenga urebeye ku bifuniko byayo kuko ntihabura akantu gato bitandukaniraho

• Ikindi waheraho ugira amakenga ni ku rutonde rw’ibiri mu muti. Ayo ni amazina y’ibindi bivangwa mu muti binyuranye.

• Ushobora kuba wari umuti uvura neza ariko noneho aho kuvura ugasanga uwawukoresheje ari kurushaho kuremba. Icyo na cyo wagiheraho ugira amakenga.

• Kumenyako ari umwiganano rero byeruye bimenyerwa gusa muri laboratwari ipima ubuziranenge bw’imiti.

Kuri ubu imiti y’imyiganano myinshi iza muri Afrika, Aziya na Amerika y’amajyepfo.
Impamvu ni uko ubushobozi bwacu mu kugenzura ko imiti itujuje ubuziranenge bukiri hasi. Gusa leta zikora uko zishoboye ngo zikumire iyo miti.
Icyakora nanone ntitwabura kuvugako kuri ubu 1/3 cy’imiti ya malaria ari imyiganano nkuko bitangazwa n’ishami ry’umuryango w’abibumbye rishinzwe ubuzima ku isi (WHO/OMS).

• Ikindi nanone hari inganda zizwiho gukora imiti ihenze. Izo ni nka:

Pfizer

Denk Pharma

Novartis

GSK

Sanofi

n’izindi…

Rero iyo ubonye umuti wanditseho ko wakozwe n’urwo ruganda nyamara ugasanga urahendutse, jya ugira amakenga. Icya mbere usabwa guhita ukora ni ukugenzura icyo umuti upfunyitsemo ukagereranya n’ibindi usanzwe uzi, cyangwa ukitabaza abahanga bagusumbyeho.

Urugero nka Viagra ikorwa na Pfizer igura byibuze 9,000FRW mu gihe ushobora kubona indi yanditseho Pfizer igura nka 600FRW!!! Gusa ntibivuzeko imiti twita Viagra zihendutse zose ari pirate,kuko hari n’igihe tuwita viagra kandi ari Nelgra, ibi biterwa n’izina uruganda rwahisemo, ahubwo uramutse ubonye iyanditseho ko yakozwe na Pfizer ihendutse, uzitonde. Kanda hano usome generique na specialite uko bitandukana

Turizerako dusubije abajyaga bibaza icyo kibazo.

Sigasira amagara.