Ku bantu bafite ikibazo cy’umuvuduko ukabije w’amaraso cg se abafite ibyago byo kwandura, dore urutonde rw’imbuto n’imboga zishobora kugufasha mu kugabanya umuvuduko ukabije w’amaraso.
-
Imboga zagufasha kugabanya umuvuduko ukabije w’amaraso
-
Imboga rwatsi
Izi mboga rwatsi cyane cyane izijimye nka epinard, lettuce n’izindi zifitemo manyesiyumu ihagije, fibres zifitiye akamaro umubiri ndetse na potasiyumu; ibi byose hamwe bifatanya mu kuringaniza igipimo cy’umuvuduko ukabije w’amaraso, ugahora ku rugero rukwiye.
-
Beterave (cg Beetroot)
Niba urwaye indwara y’umuvuduko ukabije w’amaraso, ikirahuri cy’umutobe wa beterave gifasha cyane ku buryo budasanzwe mu kuwugabanya nyuma yo kuwunywa. Ibi biterwa nuko ukize cyane kuri nitrate na potasiyumu byombi by’ingenzi mu kuringaniza umuvuduko w’amaraso.
-
Ibishyimbo n’amashaza
Ibishyimbo bikungahaye ku binyabutabire 2 by’ingenzi mu kugabanya umuvuduko w’amaraso aribyo potasiyumu na manyesiyumu, proteyine ziboneka mu mashaza zifasha umubiri mu kugabanya umuvuduko cyane.
Soma birambuye ibyo kurya bya mbere bikungahaye kuri potasiyumu https://umutihealth.com/2017/01/ibiribwa-bibonekamo-potasiyumu/
-
Ibirayi n’ibijumba
Ibirayi kimwe n’ibijumba muri rusange bibonekamo sodiyumu nke (umunyu muke), bikabonekamo potasiyumu nyinshi, bituma biba ibyo kurya by’ingenzi mu kugabanya umuvuduko w’amaraso igihe wazamutse cyane. Ndetse bibonekamo manyesiyumu ihagije, ifasha amaraso gutembera neza no gutuma imyunyungugu ihora ku rugero rukwiye mu mubiri.
-
Radi
Ubushobozi bwa radi bwo kugabanya umuvuduko ukabije w’amaraso, buzivana mu kinyabutabire cyitwa ethyl acetate kibonekamo.
Ubushakashatsi butandukanye bwerekana ko kurya ibibabi bya radi kenshi bifasha mu kugabanya umuvuduko ukabije w’amaraso uri hejuru.
-
Imbuto zagufasha kugabanya umuvuduko ukabije w’amaraso
-
Avoka
Avoka ni zimwe mu mbuto zikungahaye cyane kuri potasiyumu, ifasha mu kuringaniza umunyu mu mubiri. Ibonekamo kandi ibinure byiza, bifasha mu kugabanya urugero rw’umuvuduko ukabije w’amaraso.
-
Imbuto zibonekamo aside
Izi ni imbuto nk’amacunga n’indimu, zibonekamo intungamubiri nyinshi n’urugero ruri hejuru rwa potasiyumu, vitamin na fibres. Izi mbuto zifitemo ubushobozi bwo kurwanya ububyimbirwe no kugabanya urugero rwa cholesterol nyinshi mu maraso, bityo umuvuduko ukagabanuka.
-
Imineke
Umuneke ni rumwe mu mbuto ziboneka cyane kandi zikungahaye cyane kuri potasiyumu. Iyo potasiyumu yabaye nke, bitera umuvuduko w’amaraso kuzamuka cyane. Uyu munyungugu ufasha kandi mu kugabanya urugero ruri hejuru rw’umunyu (sodium), bityo umuvuduko w’amaraso nawo ukagabanuka.
-
Ipapayi
Usibye potasiyumu na manyesiyumu ibonekamo, ipapayi ikize cyane kuri flavonoids, ifasha cyane mu kugabanya umuvuduko ukabije w’amaraso.
-
Inkeri
Inkeri z’ubwoko bwose zikungahaye cyane kuri potasiyumu ndetse n’intungamubiri za anthocyanin zigabanya ibyago byo kurwara indwara ya hypertension ndetse zikagabanya n’umuvuduko w’amaraso igihe uri hejuru.
Niba wifuza kwirinda iyi ndwara, inkeri zagakwiye kuba imbuto wibandaho.
Indwara y’umuvuduko ukabije w’amaraso (hypertension) ni indwara iterwa n’imyitwarire yawe (uko urya, uko ukora sport ndetse n’imibereho yawe), bityo rero mu kuyihashya wagakwiye nabwo kwibanda ku myitwarire yawe; ukarya neza imbuto n’imboga zifasha mu gusukura umubiri, ndetse ukirinda ibiwangiza, gukora sport ndetse no kuryama bihagije.
